يوم طويل ... دوشه وزحمه ولف كتير
حر وشمس... ورطوبه ومن ده كتير
دوخه وهده... ولا عادش في تفكير
خنقه من مواصلات زي علب السردين
عماله اجري وألفّ وألم صبر السنين
اصبر واتصبر لحد ما اطفي لهيب الحنين
ع السلم بنط خطوه ورا التانيه
ما هي هانت وهبقى معاه ف ثانيه
ماهو واحشني .. والشوق جوايا عاصرني
من ست ساعات سبته ع النّنيّ
ف ليالي الشتا البارده حضنك يدفيني
وف نار الصيف الوالعه... برضه بترضيني
أفكاري راحت ومن دماغي اتنططت
وكل حته ف جسمي خلاص اتشعوطت
الشوق ساحبني ليك بلهفه مولعه
غرامي ناااار.. وبيك راضيه ومسلمه
بمزاجي جايه من غير حوارات ولا تكتكه
وآدي الموبايل والباب ولا حد يقطع خلوتي
يلا ... اطفي لهيبي ولهاليبي
عوضني اللي راح واسقيني
انعش العطشان وصب ف وريدي
يا دُش .. ميتك الساقعه تحييني
ودي نعمه يا رب صونها واحميها
********
********
