أوقات كتير بحس اني
عايشه في بيت غريب
بيت من زجاج
بتفرج على كل شيء
بشوف كل المشاعر والأحاسيس
بلمس الحزن في وجوه الناس
وانقب عن الفرح في طيات قلوبهم
بفرح واحزن واتألم وياهم
بتحلل وادوب بين ذرات الزجاج
اعبر للعالم التاني
اشاركهم الأماني
واطبطب عليهم في المآسي
واحوّش دموعهم جوا قلبي
اللي عمره ما بيبقى قاسي
وساعات اجري استخبى
استتر من كل القلوب
يتصلب الزجاج
يتحول لفولاذ يعكس الاضواء
برغم انه لسه شفاف
تتجمد الدقات في الضلوع
يجف عطر التواصل
وتدبل الحياه جواه
بعيون بلاستيك وموميا قلب
اتابع الأحداث وتستمر الحياه
