انت فرحي اللي عاش يا عنيه ..وانت ..انت اللي خايفه عليا

انت فرحي اللي عاش يا عنيه ..وانت ..انت اللي خايفه عليا

Sunday, September 9, 2007

روعة الإحساس



عمرك جربت الإحساس ده
تبقى لوحدك من غيره
قاعد بترتب هدومه وتحط فنجانه
ونظارته وحاجاته
تشم أنفاسه ويغمرك عطره
يملاك دفأه وتحن لعطفه
ياخدك الحنين ويرجعك سنين
تلقاه وياك تاني في نفس المكان
تضمك نظراته وايديه بتملس على شعرك
وشفايفه بترسم حنيته على خدك
تسمع كلماته تدوب في حروفه
ويسكنك عشقه.. يحوطك الحنان
وتملك الأمان في حضنه
تنسى الزمان والمكان...تعوم في حبه
كل لحظه يوحشك اكتر واكتر
تعبيرات ملامحه تملى عيونك لحظه
وتووه سنين وترسى تاني على شطه
وتفتح عيونك.....تلقى هدومه جوا حضنك
!!!راااح فين؟؟ معقوله كان هنا
ولا ده طيف..!! معقوله يسبني بالسرعه ده
أبداً...ده أكيد راح يجيبلي هديه
مهو مش معقوله يكون راح تاني
أصل اللي بيروح مره مبيرجعش تاني
استحاله يقدر على القسوه والبعد
ده هو نبع العطف والحنان
وإزاي يسبني شريد !!...في الدنيا وحيد
ده أكيد زياره سريعه....تصبيره ليوم اللقا
ده وحشني أوي...تعبيرات ملامحه لسه بتعاكسني
لسه سمعا رنة ضحكته
لسه بتنفس أنفاسه ..لسه دفء لمسته
لسه نار حبه في عروقي ساكنه
لسه بتداعبني همساته...ده لسه وحشني مووت
بيزيد عليا الشوق...ويغلبني موج الحنين
اضم نظارته وفنجانه وأبوس هدومه
وأجري أدور على كل ذكرى في كل شارع
!!يمكن.... يجييني تاني
هنا ضحكنا........وهنا بكينا
هنا لعبنا.......وهنا غنينا
هنا هزرنا ....وهنا دموعنا هزتنا
هنا عاكسني....وهنا ضمني لحضنه
هنا خاصمني......وهنا صالحني
...هنا وهنا وهنا
وترميني موجه ورا موجه.. لموجه
وألف شوارع شافت حنيني له ..شافت فكري بيه
شافت قلبي بيدور عليه....شافت لوعة عيوني
شافت حزن فتتني....شافت رحله هدتني
شافت سواد الدنيا في عيوني ...لحظة ما يخاصمني
عرفتني الأماكن وعرفته.....شافتني ولا شافته
قالتلي : خلاص.... ما لكيش غير جنة الذكريات
ودعوه لرب العباد...يرحمك من كتر السهاد
!!!!!!ويقربك لحبيبك في جنة الخلد
خلاااااااااص يا عطر الحياه وشمس الأمان
خلااااص يا أغلى ما في الوجود
هتفضل في دمي وأنفاسي
هتمسح دموعي
هعيش بيك..وأستنى ألاقيك
في كل مكان وزمان
حتى تجمعنا الفردوس الأعلى
يارب العالمين

10 comments:

Hannoda said...

وكإني بقرى لحد غيرك

مشاعرك في العاده بتداريهالدرجة إ،ي مندهشة جدا

كلمات جميلة جدا و الاحساس فيها قوي .. عيشني فحاجات كإني أ،ا كاتباها على فكرة

يا رب ما كونش أخر حاجة تكتبيها

و يارب ما نتفارقش غير في الأماكن بس

مبروك ع المدونة
:)

زُمُرده said...

4 My Lovely Hannoda

احلى حاجه انك تكوني اول من يعلق
واكتر انسان عارفني وحاسسني
اكيد مش هتكون اخر حاجه اكتبها
والله غاعلم ممكن انشر اد ايه من اللي بكتبه
ما انت عارفه دماغي
ربنا يباركلي فيك

Hannoda said...

ويباركلي فيك يا زمردتي
:)

Anonymous said...

qobati

كلام كبيرانا اقول صاحبهاداخله نهر من الاحاسيس والمشاعريوجد ابداع وفكر

عبدالله

زُمُرده said...

to
qobati
اليك يا عبدالله

انت اللي جواك انسان بيحس وبيفكر
يخيليك تشوف اللي ورا السطور
وبين الحروف وجوا القلوب

Anonymous said...

اللة عليكى كلمات بجد تحفة زى ماتكونى بتلمسينى وبتعبرى عنى وعن ناس كتير اوى وبتاخدينا لعالم تانى غير الواقع اللى عايشينو
احيكى على اسلوبك الرقيق وكلماتك الصادقة المعبرة دى اول مرة ازور مدونتك وان شاء اللة مش هتكون الاخيرة
توتا......

زُمُرده said...

***توتا***
تسلملي احلى زياره
واحلى كلام

بس مادامت تحفه ....طب آخد الكلمات واروح المتحف اقعد هناك...ايه رأيك؟

بهزر اكيد
بس كومنتك جاء في وقت مناسب
لأني حسيت بالفعل انه تحفه الناس تتفرج
ولا تعلق ...بالخير ولا حتى بغيره
يارب متكونش الزياره الأخيره
ولو ليك عنوان او مدونه
او اي مكان خبريني
لأني نفسي ازورك

Soooo said...

عارفه يا زمرده
الجميل في كلامك ده ان الواحد بيحسه في كل لحظه مع اي شخص
يعني وانا بقراه لتاني مره كده افتركت امي الله يرحمها بكل كلمه قلتيها
وافتكرت اول حالة حب عابر في ايام ثانوي
افتكرت واحد صاحبي قوي باستجدعه قوي قوي كان معانا في الكليه وهاجر مع ابوه وامه اليابان

بجد افتكرت حاجات كتير والله

ربنا يوفقك يارب ويكرمك دنيا واخره ..
قولي امين

زُمُرده said...

****Soooo****
*******

قولت يا سيدي آآآمييين
مش هتتخيل اني اخدت قرار المدونه ده بعد فتره طويله
واللي شجعني هو البوست ده
وكان نفسي الناس تقرآآه قوي وتقلي وصلها حاجه من احساسي

او حست باي حاجه حتى!!!! فرحتني
بكومنتك ده
لأني كتبته في الأصل بمجموعة مشاعر
اساسها جدتي الله يرحمها
وحبايبي في كل زمان ومكان
دمجتها وقولت يارب
والحمدلله
اني قدرت اعبر عن احساسي واحساس ناس كتيييير كل ما يقرؤه يفتكروا بيه ناس
ويمكن ربنا يكرمهم ويدورا على الناس لو كانوا بعاد عنهم
او يعملوا لهم اي حاجه تسعدهم
يارب

آآآآمييين

مجلة سيكولوجية مصرية said...

كلما توغلت اكثر فى مدونتك اعجبت بها اكثر

تحياتى